主页 > 新奇书屋 >【抗争时代】「比阿妈叫唔好同人烚气个啲全部同我入嚟」 >


【抗争时代】「比阿妈叫唔好同人烚气个啲全部同我入嚟」


2020-06-13

【抗争时代】「比阿妈叫唔好同人烚气个啲全部同我入嚟」

是咁的,我阿妈知道我在茶餐厅同人烚气之后,苦口婆心地劝我要小心为上。在规劝我之前,阿妈自己就非常激动地提到示威者被如何对待:打至骨折、非礼、唔俾见律师……「佢哋有啲得十六七岁咋,我睇见真係好心痛。」阿妈如是说。


阿妈可能唔记得咗,我之所以会喺茶餐厅同人嘈,其实都有一半原因係因为佢嘅家教。阿妈好似未读完小学,十二三岁就出嚟做童工,但係係我记忆之中,佢係会成日去图书馆借书睇嘅,有时借下食谱、园艺书,有时借下历史书、心灵鸡汤哲理书等等。佢呢几年同我讲得最多嘅,係《陈寅恪的最后二十年》,同季羡林《牛棚杂忆》。


我人生中嘅第一次游行,都係同我阿妈一齐去嘅。我哋呢一代废中,大部份都係喺1989年接受政治启蒙。我仲记得大游行係我会考考经济科之前一日,我哋全家都照出嚟。人群中我哋迫呀迫,行呀行,我阿妈突然好勇武咁嗌咗一句「打倒中国领导人!」可能句口号太长啦,印象中冇乜人跟机,而我又正值敏感嘅青春期,嗰一刻都有啲尴尬癌发作。但无可否认阿妈个下係型嘅。关于嗰一次游行,我仲记得当年只係得十二三岁嘅细佬,係队伍见到白姐姐,狂笑佢个妆化得好浓。实在我屋企嘅基因除咗嗌交染色体外,烂gag指数都唔低。唔知白姐姐而家嫁咗比前朝西环契仔之后,对当年嘅妆容有冇些少反省呢?


之后,入大学读过两钱书,基本上拣咗和理非条路——呀唔係,唔可以话「拣」,因为嗰阵时冲冲子都未係option。后来做动物权益,自己都叫做筹办过唔少游行集会,誓估唔到今时今日,莫讲话筹办,就算係参加民阵游行,都令我紧张非常。一来自己年纪大,精神体力都唔是下下应付到;更重要嘅係,而家集会就算攞咗不反对通知书,都可能变非法集结,甚至会俾人打俾人拉——我人生前半世学到嘅常识已经用唔着㗎啦。我唔敢话自己会华丽变身成勇武派,但係对前线嘅行动都会尽量理解和支持。


年中啲蓝丝嘅歪理其实都听唔少;之所以我终于忍唔住会喺茶餐厅同人开拖,首先係因为佢提到荃湾挡在拔枪警员前的阿叔,觉得佢唔知咩人喎。咁咁桥我又真係识得呢一位阿叔(其实佢仲细过我),佢係传道人兼动保友。唔敢话同佢好熟,但係我肯肯定佢嗰一刻绝对係出于正义同勇气。咁我就忍唔住顶番阿师奶转头,并且开展左一连串火爆对话。虽然讲嘢係大声咗,但我都坚持唔讲粗口唔人身攻击,一来係因为咁多年来嘅自我制约,二来家阵白色恐怖蔓延,如果我俾人拍片放上网,好可能会有人揸住条片向敝公司施压,而结果我亦好可能被炒的,我无奶油咁笨啫。一四年之后我真係成长左好多架。


当然,仲有一个最重要同最自私嘅原因:我唔想我个仔係一个充满大话嘅环境中成长。我身为佢阿妈,可能阻止唔到每一个大话,但见到一个都要驳一个丫。嗰日佢全程睇住我同人嗌交,我真係唔知佢有咩感想,可能佢都尴尬癌发,又或者体内的嗌交基因被启动。遗传同家教係一样好奇妙嘅嘢,可能你曾经用尽气力去抵抗佢、克服佢,但係到最后你又会发现自己以佢为荣。不过any肥,大家唔需要觉得我或任何人好型好威好英雄,毕竟呢个运动冇人要做英雄,而一个健全嘅社会需要嘅唔係英雄,係公平嘅制度。


都係果句啦,大家有力出力,有钱出钱,唔一定话喺现场向前冲,喺日常生活中挡住啲大话同谎言,都要功力同勇气。我同我阿妈讲你唔使担心,我唔会主动撩交嗌,但係杀到埋身亦都唔会怕,因为恐惧本身就是最大的恐惧。所谓「为母则刚」,呢个夏天所有香港人都变成老母,我哋係唔会惊架。

上一篇:
下一篇: